4 нафар ҳамкасбини пичоқлаган Париж полицияси ходими салафийлар билан алоқада бўлгани айтилди

3 октябрь куни Парижда маҳаллий полиция ходимлари билан боғлиқ мудҳиш ҳодиса юз берган ва 45 ёшли кар-соқов полициячи 4 нафар ҳамкасбини пичоқлаб ташлаганди. Оқибатда уларнинг уч нафари ҳалок бўлган, бир нафар аёл полициячи оғир аҳволда қолмоқда. Бу қотилликни амалга оширган полициячи ҳақида ишни олиб бораётган прокурор қўшимча маълумотларни берди.
Қотиллик ишида қатнашаётган прокурор Жан-Франсуа Рикарнинг айтишича, 45 ёшли полициячи радикал салафийлар билан алоқада бўлиб турган. У 1,5 йил аввал ислом динини қабул қилгани ҳам айтилди.
Париж полициясининг разведка бўлимида электроника бўйича мутахассис бўлиб ишлаган 45 ёшли бу ходим жуда кўп разведка маълумотларини билгани ва катта эҳтимол билан уларни радикал гуруҳлардаги шерикларига етказиб тургани ҳам истисно қилинмаяпти. Қотилликни амалга оширган куни полициячи кўплаб радикал кайфиятдаги хабарлар қолдиргани аниқланди.
Франция аҳолиси мамлакат ички ишлар тизимида ислоҳотлар кераклигини ва айни дамдаги ички ишлар вазири Кристоф Кастанер истеъфога чиқишини талаб қилмоқда. Франция парламенти ҳам вазир истеъфосини сўраган.