АҚШ прокуратураси Ҳондурас президенти наркобарондан пора олганини таъкидлади

Пакана лақаби билан танилган мексикалик наркобарон Хоакин Гусман Ҳондурас президенти Хуан Орландо Эрнандесга жиноий таъқибдан қутулиш учун 1 млн доллар пора берган. Бу ҳақда АҚШ федерал прокурори ёрдамчиси Жейсон Ричмэн маълум қилди.
"Гусман шахсан 1 млн доллар берган", - деди у Ҳондурас президентининг укаси Хуан Антонио Эрнандес иши бўйича Манхэттенда ўтаётган суд мажлисида. 
Хуан Антонио Эрнандес ўтган йил ноябрда АҚШда ноқонуний гиёҳванд моддалар савдосига алоқадорликда айбланиб қўлга олинганди.
Ҳондурас президенти бу айбловни рад этди.
"Айбловлар 100 фоиз ёлғон, бемаъни ва кулгили", - деб ёзди Эрнандес ўзининг Twitter саҳифасида.
Августда Ҳондурас ОАВда мамлакат президенти ўзининг 2013 йилги сайловолди кампаниясини молиялаштириш учун наркомафиядан маблағ олгани ҳақида хабарлар чоп этилган, натижада президентга қарши намойишлар бўлиб ўтганди.