Евросиё иқтисодий иттифоқи етакчилари ягона молия бозори концепциясини тасдиқлади

Евросиё иқтисодий иттифоқига аъзо давлатлар етакчилари Евросиё олий иқтисодий кенгаши йиғилишида ягона молия бозори концепциясини тасдиқлади. Бу ҳақда Беларусь президенти Александр Лукашенко маълум қилди.
Унинг таъкидлашича, бу билан "капитал ва хизматларнинг эркин ҳаракатланишини таъминлаш учун асос яратилди".
Беларусь раҳбари шунингдек, бундай бозорнинг шаклланиши рақамлаштириш билан биргаликда олиб борилиши кераклигини таъкидлади.
Евросиё иқтисодий иттифоқи халқаро минтақавий иқтисодий интеграция ташкилоти бўлиб, унга Арманистон, Беларусь, Қозоғистон, Қирғизистон ва Россия аъзо ҳисобланади. Молдова ташкилотда кузатувчи мақомига эга. Вьетнам, Эрон, Хитой ва Куба ташкилот билан эркин савдо зонаси бўйича келишув имзолаган. Иттифоқ билан ҳамкорлик қилишга 50га яқин давлат қизиқиш билдирмоқда.