Москвадаги норозилик акцияси илк бор ҳибсга олишларсиз ўтди

31 август куни Москвада сиёсий қатағонларга қарши келишилмаган акция бўлиб ўтди. РБК мазкур акция тафсилотлари билан таништирди.
Акция қандай ўтди?
Акция соат 14:00да Чистие прудида бошланди. Йиғилганлар Пушкин майдони томон йўл олишди.
Акцияда депутатликка номзоди рўйхатга олинмаган Любовь Соболь сўзга чиқди.  
Полиция ва Росгвардия намойишчиларнинг йўлини тўсмади ва улар Пушкин майдонига кириб келмагунича митингчиларни тарқалишга чақирмади.
15:30ларда ҳуқуқни муҳофаза қилиш органлари ходимлари Пушкин майдонини ўраб ола бошлади ва йиғилганларни тарқалишга чақирди. Орадан ярим соат ўтгач, ўраб олиш бекор қилинди. 
ИИВ келишилмаган акция қатнашчилари 750 нафар бўлганини маълум қилди.
Мэрия нима учун акцияга рози бўлмади? 
Мэрия акция ўтказишни рад этишини у пиёдаларнинг ҳаракатланишига халақит бериши мумкинлиги билан изоҳлади. Бундан ташқари, Москвада шу куни Билимлар кунига бағишланган қатор тадбирлар ўтказилиши режалаштирилган бўлган.
Акция ўтказилишига нима сабаб бўлди?
Ташкилотчиларнинг сўзларига кўра, мазкур акция сиёсий қатағонларга қарши қаратилган. Уларнинг фикрича, депутатликка номзодлари рўйхатга олинмаган Илья Яшин, Константин Янкаускаус ва Дмитрий Гудков, номзод Юлия Галяминаларнинг ҳибсга олиниши ҳамда 27 июлдаги акциялардаги «оммавий тартибсизликлар» бўйича иш сиёсий қатағонга киради.
Аввалги акциялар қандай ўтганди?
13 июлдан бери тўртта акция ўтказилди. Улардан иккитаси - 20 июль ва 10 августдаги акциялар ҳокимият билан келишилганди.
27 июлдаги келишилмаган акциядан сўнг 1373 киши ҳибсга олинди ва «оммавий тартибсизликлар» бўйича иш қўзғатилди.
10 августдаги келишилган митингга 50 минггача киши келди. Митингдан сўнг, турли маълумотларга кўра, 136 тадан 244 тагача киши қўлга олинди.
31 августдаги акция нимаси билан фарқ қилди? 
Полиция, ОМОН бўлмади ва намойишчилар йўли тўсилмади.
Ўтган сафарги келишилмаган акциялар вақтидагидан фарқли ўлароқ, дўкон ва кафелар ёпилмади ва ишлашда давом этди. 
Ҳукумат нима учун куч ишлатмади? 
Москва давлат думасига бўладиган сайловларга бир ҳафта қолди ва ҳукуматга низо керакмас, деб ҳисоблайди сиёсатшунос Ростислав Туровский. Унинг фикрича, шунинг учун «вақтинчалик илиқлик» бошланди.  
Сиёсатшунос Александр Пожалов ҳам унинг фикрига қўшилади. Унинг қайд этишича, ҳукуматга сайловлар арафаси ва биринчи ўқиш ҳафтаси оммавий ҳибсга олишларсиз ўтиши фойдали.