Эронда аёлларга ЖЧ-2022 саралаш учрашувини стадионда томоша қилишга рухсат берилди – ОАВ

Эронлик аёлларга 2022 йилги жаҳон чемпионатининг Эрон ва Камбожа терма жамоалари ўртасидаги учрашувига ташриф буюришга рухсат берилди. Учрашув 10 октябрда бўлиб ўтади. Бу ҳақда Inside the Games портали хабар берди. 
Манбанинг хабар беришича, бундай баёнот билан мамлакат спорт вазири ўринбосари Жамшид Тохизода чиқиш қилган. 
Шунингдек, Осиё футбол конфедерацияси (AFC) ФИФА билан биргаликда Эронда келгусида ҳам аёллар футбол учрашувларига ташриф буюришларини таъминлаш бўйича ишлар олиб бормоқда.
Теҳронда Эрон ва Сурия ўртасида июнда ўтган ўртоқлик учрашувида бир неча аёл ҳибсга олинганди. Эрон қонунчилигига кўра, эркак мухлисларнинг тажовузкор хатти-ҳаракатлари ва сўкинишлари “аёлларнинг нозиқ руҳиятига таъсир қилиши” важи остида аёлларга футбол стадионларида бўлиш тақиқланган.
2018 йил октябрда Эрон ва Боливия ўртасида ўтган учрашувга 100 аёлга, ноябрда эса Эроннинг “Персеполис” ва Япониянинг “Касима Антлерс” клублари ўртасидаги Осиё чемпионлар лигаси финали жавоб учрашувига 500 аёлга ташриф буюришга рухсат берилган.