AFP: Ҳонгконг чегарасида Хитой ҳарбий полицияси отрядлари тўпланди

Хитой ҳарбий полицияси отрядлари Ҳонгконг билан чегарадош Шэньчжэнь шаҳридаги стадионга тўпланди. Бу ҳақда Agence France-Presse хабар берди.
Агентликнинг хабарига кўра, стадионда ҳарбий либосдаги бир неча минг киши, юк машиналари, бронетранспортёрлар ва мотоцикллар жамланган.

Ҳонгконгда июнь ойидан бери норозилик намойишлари давом этмоқда. Мутахассисларнинг фикрича, намойишлар тўхтамаса, Пекин Ҳонгконг устидан назоратни кучайтириши мумкин.
Июль охирида оқ футболкаларда бўлган бир неча ўнлаб эркаклар намойишчиларга калтаклар билан ҳужум қилганди. 
1 июлда эса норозилик намойиши иштирокчилари Ҳонгконг парламентини ўз назоратига олган. Кейинроқ полиция бинони намойишчилардан озод этган.
Шу билан бирга АҚШ президентининг миллий хавфсизлик бўйича ёрдамчиси Жон Болтон Хитойни Ҳонгконгдаги вазият ёмонлашса, “жиддий иқтисодий оқибатлар” кутиши мумкинлигини айтди.
Ҳонгконг 1842 йилдан 1997 йилгача Британия мустамлакаси бўлган. Айни вақтда у Хитой таркибига махсус маъмурий туман сифатида киради.