Бельгиядаги шаҳар аҳолиси қадимий кўприк бузилишига норозилик билдирди

Бельгиядаги Турн шаҳри аҳолиси ҳукумат қадимий кўприкни ҳар бир тошини кўз қорачиғидек асраган ҳолда бўлаклаб, сўнгра уни қайта тиклашга ваъда берганига қарамасдан уни бузаётганига норозилик билдирди.
Готика услубида қурилган Пон-де-Тру кўприги 13 асрга мансуб. Айрим маълумотларга кўра, кўприкнинг икки минораси архитектура ёдгорлиги ҳисобланади. Бошқа маълумотларга кўра эса, бутун бошли кўприк ҳам тарихий деб топилган.
Турнда 2015 йилда кўприкни қайта қуриш бўйича консультатив референдум ўтказилган. Ўшанда овоз берганларнинг аксарияти кўприкни илгаригидек, тошлардан тикланган ҳолда қайта қуришга овоз берганди. Кўприкни қайта қуриш лойиҳаси йирик кемалар унинг остидан ўтишига шароит яратиш учун ишлаб чиқилганди.
Якшанба куни ҳукумат ёллаган пудратчилар кўприкни парчалашга киришишди. Иш жараёнини кузатиш учун юзлаб шаҳарликлар тўпланди. Аммо кўприк ваъда қилинганидек ҳар бир тоши авайлаб олиниб эмас, қудратли техника билан бузила бошлади. Кўприк тошларининг бир қисми дарёга тушди. Пудратчилар бузиш ишлари якунланганидан сўнг барча тошларни дарёдан чиқариб олишга ваъда беришди.
Шаҳар аҳли эса ишнинг бундай боришига нисбатан норозилик билдирмоқда. Уларнинг фикрича, шаҳарнинг тарихий мероси йўқ қилинмоқда. Айримлар мамлакат энергетика ва атроф-муҳит вазири Мари-Кристин Маргемга норозилик мактуби ҳам йўллади.
Кўприк 2021 йилда қайтадан тикланиши режалаштирилган.