Владимир Зеленский АҚШ президенти билан гаплашди

Украина президенти Владимир Зеленский америкалик ҳамкасби Дональд Трамп билан телефон орқали мулоқот қилган. Бу ҳақда Украина етакчисининг матбуот хизмати хабар қилмоқда.
Суҳбат асносида АҚШ президенти Зеленскийни унинг «Халқ хизматкори» партиясини 21 июль куни муддатидан аввал ўтказилган парламент сайловларида ишончли ғалаба қозонгани билан табриклаган. Трампнинг фикрича, Украинанинг янгиланган ҳокимияти мамлакат имижини тезда яхшилайди, шунингдек, Киев ва Вашингтоннинг ўзаро ҳаракатини тўхтатиб турган коррупцион ишларни суриштиради.
Шунингдек, президентлар Зеленскийнинг АҚШга ташрифи мобайнида иккитомонлама муносабатларни атрофлича муҳокама қилишга келишиб олишган.
Июль ойи бошида Украинанинг АҚШдаги элчиси Валерий Чалий Владимир Зеленский жамоаси август-сентябрь ойларида Украина етакчисининг Вашингтонга ташрифини ташкиллаштиришни тўлиқ якунлашини эълон қилган эди. Унинг сўзларига кўра, икки мамлакат президентлари ўзаро телефон мулоқотлари чоғида аллақандай «муносабатлар кимёси»ни топишга муваффақ бўлишган.
Эслатиб ўтамиз, Украина парламентига навбатдан ташқари сайловлари 21 июль куни бўлиб ўтди. Сайлов якуний давомати 49,84 фоизни ташкил этган. Владимир Зеленский томонидан асос солинган «Халқ хизматкори» партияси Украина тарихида Олий Радага ўтказилган сайловларда рекорд даражадаги қўллаб-қувватловга эга бўлди — 43 фоиздан ортиқ овоз.