Туркия агарда АҚШ билан келиша олмайдиган бўлса, Сурияда янги операция ўтказиш билан таҳдид қилди

Туркия мудофаа вазири Хулуси Акар Сурияда хавфсизлик ҳудуди ташкил этиш бўйича АҚШ билан келиша олмайдиган бўлса, ушбу мамлакат шимолида янги операция бошланишини маълум қилди.
Душанба куни Анқарада АҚШнинг Сурия бўйича махсус вакили Жеймс Жеффри бошчилигидаги делегация Хулуси Акар билан музокаралар ўтказди.
"Биз АҚШ делегациясига барча таклифларимизни тақдим этдик. Улар таклифларимизни ўрганиши ва зудлик билан жавоб беришини кутяпмиз. Вақт чўзилишини кутиб тура олмаслигимизни ва зарур бўлса ташаббусимиздан фойдаланишимизни яна бир бор таъкидладик",- дея Акарнинг сўзларидан иқтибос келтирмоқда Anadolu агентлиги.
Аввалроқ Туркия ташқи ишлар вазири Мавлут Човушўғлу АҚШнинг Сурияда хавфсиз ҳудуд ташкил этиш бўйича янги таклифи Туркияни қониқтирмаслигини айтганди. У Туркиянинг "сабри тугаб бораётганлигини", таъкидлаб, "агарда келишувга эришилмаса", Туркия ўзи мустақил ҳаракат қилишини айтганди.
Туркия президенти Ражаб Таййип Эрдўған агарда АҚШ суриялик курдларнинг мудофаа кучларини Фрот шарқи ва Манбиждан олиб чиқиб кетмаса, Анқара операция бошлашга тайёрлигини билдирганди.