Россиядаги Калининск АЭСида авария ҳолати сабабли учта энергия блоки ўчирилди

Тверь областидаги Калининск АЭСида авария ҳолати юз бергани сабабли тўртта энергия блокидан учтаси тармоқдан ўчирилди. Бу ҳақда РИА Новости хабар бермоқда.
Россия энергетика вазирлигининг маълумот беришича, ҳодиса эрталаб юз берган.
Станцияда бир вақтнинг ўзида умумий юкламаси 3,2 минг МВт бўлган биринчи, иккинчи ва тўртинчи блоклар бир вақтнинг ўзида ўчган.  
Вазирликнинг хабар беришича, авария-тиклаш ишлари давом этмоқда.  
Блоклар трансформаторлардан биридаги қисқа туташув сабабли иккита юқори кучланишли электр узатиш линияларининг ўчиши сабабли ўчиб қолган.  
Қайд этилишича, тўртинчи энергоблок энергия тизимига уланишга тайёр, биринчи ва иккинчи блоклар эса ўчиш сабаби аниқланганидан сўнг ишга туширилади.
Калининск атом электростанцияси (КАЭС) Тверь областидаги Удомля кўли соҳилида жойлашган. Уни қуриш 1974 йилда бошланган, 1984 йилда фойдаланишга топширилган.
Эслатиб ўтамиз, 29 июнь куни Ўзбекистонда атом электр станцияси қурилиши учун танланган Жиззах вилоятидаги Тузкон кўли яқинидаги ҳудудда муҳандислик-тадқиқот ишларининг иккинчи босқичи бошланди. АЭС қурилиши билан «Росатом» давлат корпорацияси шуғулланади.