Соҳибкор Раҷабов барои сокинони Муъминобод Маркази саломатӣ сохт
Дар маркази мазкур 12 нафар пизишкони маҳаллӣ бо ҷойи кор таъмин шуда, барои аҳолии се деҳа хизматрасонӣ хоҳанд кард
Бо ибтикори соҳибкори ватанӣ, сокинони се деҳаи дурдасти ноҳияи Муъминобод соҳиби Маркази замонавии саломатӣ гардиданд.
Вазорати тандурустии Тоҷикистон хабар медиҳад, ки Раҷабов Шодибек дар деҳаи Деҳбаланди Ҷамоати деҳоти Деҳбаланди ноҳияи Муъминобод бо маблағи 400 ҳазор сомонӣ Маркази тиббӣ сохт.
Бар хабари манбаъ, Маркази саломатӣ аз ҳуҷраҳои қабули беморон, табиби оилавӣ, ташхиси занон, хатна ва доругузаронӣ иборат буда, бо таҷҳизоти муосири тиббӣ муҷаҳҳаз гардонида шудааст.
"Муассисаи мазкур аз маркази ноҳияи Муъминобод 7 километр дур буда, дар Ҷамоати деҳоти Деҳбаланд калонтарин муассисаи тиббӣ ба ҳисоб меравад", - таъкид мешавад дар хабар.
Дар маркази мазкур 12 нафар табибони маҳаллӣ фаъолият намуда, ба сокинони се деҳаи атрофи ҷамоат, ки дорои 605 хоҷагӣ ва 4176 аҳолӣ мебошанд, хизмати тиббӣ мерасонанд.
Комментарии (0)