Раҳмон Путинро бо солрӯзаш табрик намуда, вазъи Қирғизистонро баррасӣ карданд
Кишвардори Русия Владимир Путин имрӯз аз 68 - умин солрӯзи худ ҷашн мегирад. Дар ин робита, раисҷумҳурони аксар кишварҳо унвонии Путин номаи шодбошӣ ирсол намуданд
Дар қатори даҳҳо раисҷумҳурон, кишвардори Тоҷикистон Эмомалӣ Раҳмон низ ҳамтои русашро бо ҷашни мавлуд таҳният гуфт.
Ба иттилои котиботи раисҷумҳури Тоҷикистон, Эмомалӣ Раҳмон унвонии Владимир Путин мактуби муборакбодӣ фиристод.
Раисҷумҳури Тоҷикистон дар мактубаш ба ҳамтои руси худ беҳтарин ва самимитарин таманниёт ба муносибати зодрӯзаш орзу намудаст.
Манбаъ меафзояд, сарони ду давлат муколамаро оид ба роҳҳои рушди муносибатҳои стратегии Тоҷикистону Русия идома доданд.
"Дар ҷараёни суҳбат ҳамчунин атрофи масъалаҳои муҳими байналмилалӣ ва минтақавӣ мубодилаи афкор сурат гирифта, ба ташаннуҷи ташвишовари вазъ дар Қирғизистон таваҷҷуҳи махсус зоҳир карда шуд", - таъкид мешавад дар хабар.
Комментарии (0)