Тоҷикистон лоиҳаи «Харитаи роҳ»-ро оид ба татбиқи Стратегияи рақамикунонии долонҳои асосии нақлиётии мултимодалии ИДМ муаррифӣ намуд

​АМИТ «Ховар» бо истинод ба Вазорати нақлиёти Ҷумҳурии Тоҷикистон иттилоъ медиҳад, ки дар ҷаласа татбиқи ҳуҷҷатҳои қабулкардаи мақомоти роҳбарикунандаи Иттиҳоди Давлатҳои Мустақил, ки ба таҳкими ҳамкорӣ дар соҳаи инфрасохтори нақлиётӣ равона шудааст, муҳокима гардид. Дар ҷаласа «Стратегияи рақамикунонии долонҳои асосии нақлиётии мултимодалии давлатҳои иштирокчии Иттиҳоди Давлатҳои Мустақил», «Нақшаи амал оид ба беҳдошти инфрасохтор ва рушди долонҳои байналмилалии нақлиётии Иттиҳоди Давлатҳои Мустақил барои давраи то соли 2030», инчунин «Нақшаи тадбирҳо оид ба татбиқи марҳилаи дуюми (солҳои 2026-2030)», «Стратегияи рушди иқтисодии Иттиҳоди Давлатҳои Мустақил барои давраи то соли 2030» баррасӣ гардиданд.

Ҳамзамон дар ҷаласа Қазоқистон ташаббуси таъсиси харитаи ягонаи рақамии нақлиётӣ-логистикии Иттиҳоди Давлатҳои Мустақил ва Узбекистон лоиҳаи Консепсияи таъсиси марказҳои иттилоотӣ-логистикиро пешниҳод намуданд. Ҷониби Русия лоиҳаҳои табдили рақамии соҳаи нақлиётро пешниҳод ва иштирокчиёни ҷаласаро бо қарорҳои муосир ва таҳияҳои амалӣ дар ин соҳа шинос намуд.

Донишгоҳи нақлиётии Русия инчунин баргузории сессияи байналмилалиро оид ба омода намудани кадрҳо барои табдили рақамии маҷмааи нақлиётӣ эълон кард. Он дар доираи Конфронси VI байналмилалии илмӣ-амалии технологияҳои рақамии нақлиёт ва логистика баргузор мешавад.


Сарчашма: khovar.tj​