Лукашенко: Украина Беларусга ҳужум қилса, яна 1,5 минг км қўшимча фронт ҳосил бўлади

Александр Лукашенко Украина ҳарбийлари Беларусь билан можарони истамаслигини айтди. Унинг сўзларига кўра, бу Киев учун 1,5 минг км қўшимча фронт очилишига олиб келади.

 Украина Беларусга ҳужум қилса, бу Киев учун яна 1,5 минг километрлик қўшимча фронт пайдо бўлишини англатади. Бу ҳақда Беларусь президенти Александр Лукашенко ЕОИИ саммити якунида журналистлар билан суҳбатда маълум қилди."Украина ҳарбийлари Беларусь билан ҳеч қандай можарони хоҳламайди. Улар бу 1,5 минг километр қўшимча фронт эканини тушунишади«, — деди Лукашенко.

Унинг таъкидлашича, Беларусь ҳудудига ҳарбий ҳужум амалга оширилса, Украинадаги можаро „бутунлай бошқача сифатга“ эга бўлади. У бундай фронт Киевга керак эмаслигини таъкидлади.Лукашенконинг айтишича, Зеленский бундай баёнотни „эҳтимол, нимадир таъсирида“ қилган бўлиши мумкин."Эҳтимол, у ерда ҳам нимадир содир бўлгандир. Қаердадир чеккандир, қаердадир санчгандир ва шундан кейин бу баёнотни қила бошлагандир«, — деди Лукашенко.

Лукашенко бу фикрларни Украина Учувчисиз тизимлар кучлари қўмондонининг Беларусь ҳудудида 500 та эҳтимолий нишон белгилангани ҳақидаги сўзларига жавобан билдирди. Унинг сўзларига кўра, Минскда ҳам „аниқ координаталарга эга жиддий нишон“ бор ва бу Беларусдан унча узоқ эмас.

Шунингдек, Лукашенко бир қатор Европа давлатларидаги сиёсатчилар Зеленскийни Беларусга нисбатан кескин баёнотлар беришга ундаётганини айтди.У Беларусь ҳарбийлари Украина ҳудудида бўлмагани ва келгусида ҳам бўлмаслигини таъкидлади."Бу ҳеч қачон бўлмайди. У ерда бизнинг аскарларимиз бўлмаган ва бўлмайди ҳам«, — деди Лукашенко.

Шу билан бирга, Беларус раҳбари АҚШ билан мулоқот давом этаётганини қайд этди. У Дональд Трампнинг Украинадаги можаро бўйича позициясини „тушунарли“ деб атади.