COVID-19 билан касалланган америкаликларнинг ярмидан кўпи инфекция манбайини аниқ айта олмади

Коронавирус билан касалланган америкаликларнинг ярмидан кўпи инфекцияни қаердан юқтириб олганини билмайди. Мутахассисларнинг таъкидлашича, ушбу ҳолат жуда даҳшатли: бу касаллик асорати бўлмаган одамлардан кўплаб кишилар юқтириб олиши мумкинлигини англатади.
Коронавирус учун тести мусбат натижа кўрсатган америкаликларнинг 54 фоизи инфекцияни кимдан юқтириб олган бўлиши мумкинлиги ҳақидаги саволга жавоб беришда қийналди, дейилади АҚШ Касалликларни назорат қилиш ва олдини олиш марказлари (CDC) сўрови натижасида.
15 апрелдан 24 майгача бўлган даврда тести мусбат натижа берган шахслар тасодифий танлаш йўли орқали телефонда сўровномадан ўтказилди. Тадқиқотда жами 350 киши иштирок этди. Уларнинг фақат 46 фоизи инфекцияни кимдан юқтириб олишгани маълум эканини билдирган. 45 фоиз ҳолатларда бу оила аъзоси бўлган, 34 фоиз вазиятда - ҳамкасб.
«Ушбу хулосалар коронавирус тарқалишининг олдини олиш учун тест ўтказиш, суриштирувни амалга ошириш, алоқаларни қидириш ва инфекцияни юқтириб олган одамларни изоляция қилиш зарурлигини кўрсатади», - дейилади CDC сайтида. Тадқиқот натижалари катта ташвиш туғдиради, сабаби кўпчилик COVID-19’ни касаллик аломатларсиз кечган яқин кишилардан (оилада ёки ишда) юқтирган, дея Бостон тиббиёт мактаби доценти Жошуа Барокаснинг сўзларини келтиради CNBC. Унинг таъкидлашича, ушбу вазият туфайли касалланган кишининг алоқаларини кузатиш «ниҳоятда қийиндир».
Жонс Хопкинс университети маълумотларига кўра, АҚШда 2,77 миллион киши коронавирус билан касалланган, 129,150 киши вафот этган. 3 июнь куни мамлакатда 55 220та янги ҳолат қайд этилди - бу эпидемия бошланганидан бери рекорд кўрсаткич.