Трамп Эронга қарши мисли кўрилмаган иқтисодий операция бошланганини айтди

АҚШ Президенти Доналд Трамп Эрон таклиф қилинган дипломатик шартларга кўнмагани сабабли унга қарши мисли кўрилмаган даражадаги тўлиқ иқтисодий ва молиявий изоляция жорий этилишини маълум қилди. У Теҳронга ёрдам бераётган ёки уни қўллаб-қувватлаётган учинчи давлатларни оғир оқибатлардан огоҳлантириб, иттифоқчиларни Вашингтон чекловларига қўшилишга чақирди.

Яқин Шарқдаги келишув музокаралари муваффақиятсиз якунлангани ортидан АҚШ ва Эрон ўртасидаги қарама-қаршилик янги, янада хавфли босқичга қадам қўйди. АҚШ Президенти Дональд Трамп Теҳрон таклиф этилган шартларга кўнмагани сабабли, Эронга нисбатан дунё тарихидаги энг кенг кўламли ва қатъий иқтисодий жазо чоралари ишга туширилишини маълум қилди. Оқ уй раҳбарининг бу кескин баёноти ортида қандай режалар ётибди?

«Улар қулай имкониятдан фойдалана олишмади»: Трампнинг Truth Social’даги баёноти

Дональд Трамп ўзининг Truth Social тармоғидаги расмий саҳифасида Эрон раҳбарияти таклиф қилинган дипломатик йўлдан фойдаланмаганини таъкидлаб, қуйидаги баёнотни қолдирди:

«Ҳеч ким Эрон Ислом Республикасига битим тузиш учун мендан кўра қулайроқ имконият бермаган. Афсуски, улар бундан фойдалана олишмади. Шунинг учун бугун мен бирон бир мамлакатга қарши амалга оширилган энг даҳшатли иқтисодий операцияни эълон қиламан.», — деди Дональд Трамп.АҚШ Президентининг таъкидлашича, гап мисли кўрилмаган даражадаги тўлиқ иқтисодий ва молиявий изоляция ҳақида бормоқда. Шунингдек, Трамп Теҳронга ёрдам бераётган ёки уни қўллаб-қувватлаётган учинчи давлатларни ҳам оғир оқибатлардан огоҳлантириб, барча иттифоқчиларни Вашингтон чекловларига қўшилишга чақирди.