Суриядан яна 231 қозоғистонлик ўз ватанига қайтарилди

Қозоғистон президенти Қосим-Жомарт Тоқаев Суриядан 231 қозоғистонлик эвакуация қилинганини маълум қилди.  
“Менинг топшириғим билан 7 ва 9 май куни Суриядан 231 қозоғистонлик, жумладан асосан мактабгача ёшдаги 156 бола, хусусан 18 етим бола эвакуация қилинди. Бу катта кўламли акция Биринчи Президент – Элбоши Нурсултон Назарбоев буйруғи билан жорий январда ўтказилган “Жусан” операциясининг давоми бўлди. Барча келтирилган фуқароларга нисбатан давлат идоралари ва ноҳукумат ташкилотлари томонидан реабилитация бўйича тадбирлар ўтказилган. Тиббий, психологик ва ижтимоий ёрдам кўрсатилган”, дейилган Тоқаев баёнотида.
Қозоғистон президентининг таъкидлашича, январда қайтарилган аёллар радикал ўтмишидан воз кечган, ишга жойлашиб, яқинлари билан алоқаларни тиклаган.
2019 йил бошида Қозоғистон махсус хизматлари Қозоғистонга Суриядаги жанговар ҳаракатлар ҳудудларидан 47 фуқарони қайтаришга муваффақ бўлишган. Террорчиларга асирликка тушиб қолган эркаклар, аёллар ва болалар ёрдам сўрашган.
2012-2015 йилларда террорчилар томонидан ёлланган қозоғистонликлар асосан Афғонистон, Ироқ ва Сурияга жўнашган. Уларнинг аниқ сонини айтиш қийин, чунки одамлар ёнида бирорта ҳужжатсиз мамлакатни тарк этган ва 3-4 та давлат чегарасини кесиб ўтиб, экстремистлар қўлига тушган. 
2019 йил январида Нурсултон Назарбоев Сурияга бир неча юзлаб қозоғистонликлар кетгани, улардан кўплари ўлдирилганини маълум қилган.