Зеленский олий рададан инаугурацияси санасини белгилашни чўзмасликни талаб қилди

Украинанинг сайланган президенти Владимир Зеленский олий рада депутатларидан парламентнинг навбатдаги йиғилишида инаугурацияси санасини 19 май кунига белгилашни талаб қилди.
У олий радани инаугурация санасини белгилашни чўзишда айблади.
Шу муносабат билан сиёсатчи видеомурожаат ёзиб, унда депутатларга юртдошлари манфаати йўлида ўз мажбуриятларини сидқидилдан бажаришларини эслатиб қўйган. “Ҳозирча сиз фақатгина ўз манфаатингиз йўлида ҳаракат қилмоқдамиз, раданинг тарқатилишидан кўрқмоқдасиз ва инаугурация санасини белгилашни чўзмоқдасиз”, деб айтган Зеленский.
“Мен олий радага мурожаат қилмоқдаман: навбатдаги йиғилишда инаугурация санаси 19 майга белгилансин. Буни мен эмас, сиз манфаати йўлида ҳаракат қилишга қасамёд қилган Украина халқи талаб қилмоқда”, деб айтган Зеленский видеомурожаатида.
Зеленскийнинг таъкидлашича, мамлакат муассасаларнинг нормал ишлашига эҳтиёжманд. “Илтимос, депутатлик гувоҳномаларингиз ҳақида эмас, Украина халқи ҳақида ўйланг”, деб айтган бўлғуси президент.  
Сиёсатчининг айтишича, Украинанинг амалдаги президенти Пётр Порошенко лавозимидан кетиши олдидан фаол тарзда ҳукуматда кадрларни ўзгартиришни, судьяларни тайинлашни ва “унвонларни тарқатишни” бошлади. Зеленский Порошенкони кетиши олдидан ўзи билан сочиқ, шиппак ва швед столидан таомларни олиб кетувчи турк меҳмонхонасидаги сайёҳга қиёслаган.