Старобельск учун жавоб: Россия “Орешник” билан Украинадаги нишонларга зарба берди

Россия Мудофаа вазирлиги Старобельскдаги ҳужумдан кейин Украинадаги ҳарбий объектларга жавоб зарбаси берилганини маълум қилди. Киев эса «Орешник» Оқ черков ҳудудига урилганини тасдиқлади. Россия Қуролли кучлари Украинадаги ҳарбий бошқарув объектлари, авиабазалар ва мудофаа-саноат комплекси корхоналарига оммавий жавоб зарбаси берди. Бу ҳақда Россия Мудофаа вазирлиги маълум қилди.Вазирликка кўра, зарба Украина томонининг Россия ҳудудидаги фуқаролик объектларига ҳужумларига жавобан амалга оширилган. Зарбада «Орешник» баллистик ракеталари, «Искандер», «Кинжал», «Циркон» ракеталари, шунингдек, ҳаво, денгиз ва қуруқликдан учириладиган қанотли ракеталар ҳамда зарба берувчи дронлар қўлланган.Россия МВ барча белгиланган объектлар зарарланганини ва фуқаролик инфратузилмасига зарбалар режалаштирилмаганини таъкидлади.

Россия томонига кўра, 24 май куни Киев ва Киев вилоятида Украина ҳарбий-саноат мажмуаси объектлари, ҳарбий инфратузилма, қуруқликдаги қўшинлар бош қўмондонлиги, Украина Мудофаа вазирлиги Бош разведка бошқармаси ва бошқа бошқарув пунктлари нишонга олинган.