Ирина Болгар: «Павел Дуров фарзандларини таъминламай қўйди»

Ижтимоий тармоқларда узоқ сукутдан сўнг, Павел Дуровнинг собиқ маъшуқаси Ирина Болгар муҳокама марказига айланди. У тақиқланган платформада ёзган узун постида тадбиркор энди болаларини молиявий қўллаб-қувватламаслигини маълум қилди.

Иринанинг сўзларига кўра, Дуров ўз меросини барча биологик авлодлари ўртасида, жумладан донорлик дастурлари орқали туғилган фарзандларга ҳам тақсимлашни режалаштирган. Аммо Болгар билан бўлган фарзандларига нисбатан у аввалги ваъдаларига амал қилмаётгани айтилмоқда.

«Бир вақтлар у: „Мен тирикман, болаларим ҳеч нарсага муҳтож бўлмайди“, дерди. Энди эса улар меросни фақат 30 йилдан кейин олиши мумкин, — дейди Ирина. — Фарзандларим ҳали вояга етмаган, улар бу қадар узоқ кута олмайди».

Ирина, шунингдек, Павел энди оталикни ҳам инкор этаётганини таъкидлади:

«У болаларимизни тан олмаяпти, ҳатто бир вақтлар бирга яшаганимизни ҳам рад этмоқда. Аммо болалар ҳали ҳам ўша уйни, ўтган ҳаётимизни эслаб яшашмоқда».