Италияда ўқувчиларни олиб кетаётган ҳайдовчи ўзи бошқарган автобусга ўт қўйди

Келиб чиқиши сенегаллик бўлган, 2004 йилда Италия фуқаролигини олган ҳайдовчи 20 март туш вақтида Милан яқинидаги автомобил йўлида ўзи бошқарган ва ичида ўқувчилар бўлган автобусга ўт қўйди. Бу ҳақда RaiNews24 телеканали хабар берди.  
Маълум қилинишича, 47 ёшли ҳайдовчи автобусга бензин сепиб, унга ўт қўйган. Гувоҳларнинг айтишича, у бу қабиҳ ишини қила туриб “Ўрта ер денгизида ўлимларни тўхтатмоқчилигини” айтиб бақирган. Кўринишича, у Ўрта ер денгизи орқали Европага келиш вақтида Африка ва Яқин Шарқ давлатларидан бўлган муҳожирларнинг кўплаб ҳалок бўлишини назарда тутган. 
Милан карабинерлари ҳайдовчини қўлга олишган. Автобусда Крем шаҳридаги мактаб ўқувчилари ва уларга ҳамроҳлик қилган бир неча катта ёшлилар, жами 51 киши бўлган. Воқеага жойига карабинерларни ўқувчилардан бири чақиртирган.
Воқеа оқибатида ҳеч ким жароҳат олмаган. Бироқ 12 бола ва 2 нафар ёши катта киши маҳаллий шифохонага тутундан заҳарланиш аломатлари билан етказилган.
Воқеа жойига Милан прокурори ва карабинерлар қўмондони етиб келган. Ҳуқуқ-тартибот идоралари воқеани тергов қила бошлашган. Маълум қилинишича, ҳайдовчи аввал ҳам қонун билан муаммоларга эга бўлган.