Молдовада сайланган президент Майя Сандунинг минглаб тарафдорлари норозилик билдирди

Молдова пойтахти Кишинёв марказига сайланган президент Майя Сандунинг минглаб тарафдорлари парламентнинг тарқатилиши ва унга муддатдан аввал сайловлар ўтказилиши талаби билан чиқишди.

Норозилик акциялари иштирокчилари бош вазир Ион Кику ҳукумати ҳамда амалдаги президент Игор Додоннинг Социалистлар партияси, “Шор” партияси ва Pentru Moldova гуруҳи депутатлари шакллантирган янги парламент кўпчилигига қарши чиқишмоқда.
PAS партияси раиси ўринбосари Игор Гросу Додонни ва молдовалик олигарх Илан Шорни Сандудан “ғалабани ўғирлашга уринаётганликда” айблаган. “Йўл қўймаймиз! Фақат муддатдан аввал сайловлар, фақат парламент тарқатилиши!”, деб таъкидлаган Гросу.
Унинг таъкидлашича, бунга фақат парламентнинг тарқатилиши билан эришиш мумкин. “Бош вазир эркак эканини кўрсатиши лозим! У муддатдан олдин парламент сайловлари ўтказилиши, жамиятни парламентдаги бандитлардан тозалашга йўл очиш учун истеъфога чиқиши керак. Бу депутатлар фақатгина прокурорлар билан мулоқот қилиши керак!”, деб қўшимча қилган Гросу. 
Юзлаб полициячилар ҳукумат биноси атрофини ўраб олишган. Улар намойишчилар ҳаракатларига аралашишмаган. Айни вақтда намойишлар тугаган. Улар 2 соатга яқин давом этган ва тинч якунланган.
Намойишчиларга сайланган президент Майя Санду ҳам мурожаат қилган. Жумладан, у амалдаги президентни “мамлакатга ўт қўйишга” уринишда айблаган. 
“Игор Додон одамларни алдай олмагани учун ранжимоқда, у мамлакатга ўт қўйиб, одамлар ҳаётини янада қийинлаштирмоқчи. У шу йўл билан одамлардан унга овоз бермаганлари учун ўч олмоқчи. Бу кўпчилик шошма-шошарлик билан конституцияга ва барча меъёрларга зид равишда қонунлар қабул қилмоқда. Ушбу қонунлар фуқароларга қарши қонунлардир. Улар охирги кунларда қабул қилган қонунлар мамлакат хавфсизлигига таҳдид ҳисобланади”, деб айтган Санду.
Намойиш иштирокчилари Сандунинг президентлик лавозимига белгиланган муддатдан аввалроқ ўтиришини талаб қилишган.
“Биз сайланган президент Майя Санду конституциявий суд президент сайловлари натижаларини тасдиқлаши биланоқ 10 декабрда ўз лавозимини бажаришга киришишини талаб қиламиз. Шу куни ҳукумат муддатдан аввал парламент сайловларига йўл очиш учун истеъфога чиқиши лозим”, деб айтган намойишда парламент раиси ўринбосари ва мухолиф партия “Платформа DA” вакили Александр Слусар.  
Бундан ташқари, намойишчилар ҳукуматнинг истеъфоси ва муддатдан аввал сайловлар ўтказилиши талаб қилинган резолюцияни қабул қилишган.
Резолюцияда ҳукуматга мамлакатдаги “фалокатли ижтимоий-иқтисодий вазият” ва “коронавирус пандемиясига қарши самарали чоралар йўқлиги” учун жавобгарлик юкланган.
Бундан ташқари, ҳужжат муаллифлари якунланаётган ҳафтада Игор Додон ва Илан Шор коалицияси қабул қилган қонунлар пакети бекор қилинишини талаб қилишган.
Намойиш ташкилотчиларининг таъкидлашича, норозилик акциясида 50 мингдан кўпроқ одам иштирок этган. Уларнинг маълум қилишича, бошқа жойлардан намойишда иштирок этишни истаганлар воқеалар жойига етиб кела олишмаган, чунки полиция уларга пойтахтга киришга йўл бермаган.
Молдовада 15 ноябрда ўтган президент сайловларининг 2-босқичида Майя Санду 57,7 фоиз овоз билан ғалаба қозонди. Амалдаги президент Игор Додонга эса сайловчиларнинг 42,2 фоизи ўз овозини берган.