Россияда коронавирусга қарши бепул эмлаш бошланмоқда

Россия президенти Владимир Путин мамлакатда одамларни коронавирусга қарши эмлашни бошлашга кўрсатма берди.

Россия бош вазири ўринбосари Татьяна Голикованинг айтишича, вакцина бепул ва ихтиёрий бўлади. Путин Россия мудофаа вазирлигининг кўп тармоқли тиббиёт маркази очилишига бағишланган видеоконференцияда коронавирусга қарши эмлаш кейинги ҳафтадан бошланишини маълум қилди.
Путиннинг айтишича, Россияда аллақачон 2 миллион доза вакцина ишлаб чиқарилган ва бу оммавий эмлашга имкон бермаса-да, масштабли эмлаш учун етарли. Россияда коронавирусга қарши эмлаш даставвал коронавирус юқтириш хавфи даражаси юқори бўлган касб вакиллари – ўқитувчилар ва шифокорларда ўтказилади. Голикова декабрнинг ўзида Россияда коронавирусга қарши оммавий эмлаш бошланиши мумкинлигини истисно қилмади.
Маълумот учун, Россияда август ойида «Спутник V» воситаси коронавирусга қарши вакцина сифатида рўйхатдан ўтказилган. Айни дамда дунёда АҚШ, Британия, Хитой, Франция ва Германияда коронавирусга қарши вакцина ишлаб чиқариш ишлари давом этмоқда. Олдинроқ Британияда ҳам кейинги ҳафтадан коронавирусга қарши оммавий эмлаш бошланиши маълум қилинган эди.