Си Цзинпин Жо Байденни президент сайловларидаги ғалаба билан табриклади

Хитой раиси Си Цзинпин 25 ноябрда Жо Байденга унинг АҚШ президенти сайловларида ғалаба қозонгани муносабати билан табрик йўллади. Аввалроқ Хитой ташқи ишлар вазирлиги вакили Ван Вэньбинь ҳам Пекин номидан Байденни табриклаганди.    

“Бугун мамлакат раиси Си Цзинпин Жо Байденга телеграмма жўнатиб, уни АҚШ президенти этиб сайлангани билан табриклади”, деб маълум қилинган Хитой марказий телевидениесининг Weibo ижтимоий тармоғидаги хабарида. 
Хитой раҳбари телеграммада Хитой ва АҚШ муносабатларини соғлом ва барқарор руҳда илгари суриш нафақат икки давлат халқлари, балки халқаро ҳамжамият учун муҳимлигини таъкидлаб ўтган. 
Ўз навбатида Хитой вице-президенти Ван Цишан Камала Харрисга АҚШ вице-президенти бўлгани муносабати билан табрик йўллаган. 
Хитой дастлаб Байденга табрик йўллашга шошмаган давлатлар қаторида бўлганди. Бироқ 13 ноябрда Хитой Ташқи ишлар вазирлиги вакили Ван Вэнбин Пекин номидан Байденни президент сайловларидаги ғалаба билан табриклаганди. “Биз Америка халқининг танловини ҳурмат қиламиз ва Байденни ҳамда Харрисни табриклаймиз”, деб айтган Хитой вакили. 
Бироқ АҚШнинг амалдаги президенти Доналд Трамп сайловлардаги мағлубиятини тан олмаяпти. У демократларни сайловларда фирибгарликлар содир этганликда ва ундан “ғалабани ўғирлаб олганликда” айбламоқда.
Айни вақтда Вашингтон ва Пекин муносабатлари бир қатор масалалар, жумладан икки томонлама савдо келишуви, Ҳонгконг масаласи бўйича таранглашган.