Европа иттифоқи CureVac компаниясидан 225 миллион доза вакцина сотиб олади

Европа комиссияси CureVac фармацевтик компанияси билан коронавирусга қарши вакцинадан 225 млн доза сотиб олиш бўйича шартнома тузди.

Еврокомиссия баёнотида маълум қилинишича, шартномада CureVac вакцинаси ўзининг хавфсиз экани ва самарадорлигини кўрсатгач, ундан яна 180 млн доза сўраш имкони кўзда тутилган.
Еврокомиссия раиси Урсула фон дер Ляйеннинг таъкидлашича, бугунги кунда комиссия ўзини 1,2 млрд доза вакцина билан таъминлаб қўйди ва у билан нафақат Европа иттифоқи фуқаролари, балки дунёдаги бошқа нотавон одамлар билан бўлишади.
Еврокомиссия хабарида маълум қилинишича, CureVac билан тузилган шартнома вакцина сотиб олиш бўйича тузилган 5-шартнома бўлди. Аввалроқ бундай шартномалар AstraZeneca, Sanofi-GSK, Janssen Pharmaceutica NV ва BioNtech-Pfizer компаниялари билан тузилган.
  
Урсула фон дер Ляйен ушбу компаниялар ишлаб чиққан вакциналардан аксарияти клиник синовларнинг якуний босқичидан ўтаётганини эслатиб ўтган ва уларни тез орада қўллашга рухсат берилишига умид билдирган.
Брюсселда Европа иттифоқига аъзо давлатлар вакциналарни ўрта ва паст даромадли бошқа давлатларга хайрия қилиши ёки Европанинг бошқа давлатларига бериши мумкинлигига эътибор қаратилмоқда.
Германияда жойлашган CureVac компанияси 6 июлда Европа инвестиция банки билан коронавирусга қарши вакцинани ишлаб чиқиш ва уни катта кўламда ишлаб чиқариш бўйича 75 млн евролик кредит келишувини имзолаган.