Россияда “Спутник V” вакцинасининг барча партияси давлат томонидан сотиб олинди

Россияда коронавирусга қарши ишлаб чиқилган биринчи вакцина “Спутник V”нинг барча партияси давлат томонидан сотиб олинди ва савдога чиқарилмайди. Бу ҳақда вакцинани ишлаб чиққан Гамалея номидаги марказ директори Александр Гинцбург маълум қилди. 

“Бизда ҳамма вакцина Россия томонидан сотиб олинди, ўйлашимча, шу сабабли у на чакана савдога, на бошқа йўл билан сотувга чиқади”, деб маълум қилган Гинцбург. 
Мутахассис Россияда “Спутник V” билан оммавий эмлаш 2021 йил январь-февралида бошланишини қўшимча қилган.
Аввалроқ Гинцбург бугунги кунгача вакцина билан 40-50 мингга яқин одам эмлангани, улардан аксариятини хавф гуруҳига кирувчилар ташкил этишини маълум қилган.
Россия 11 августда дунёда коронавирусга қарши биринчи вакцинани рўйхатдан ўтказганди. Вакцина “Спутник V” деб номланган ва бир қатор бошқа вакциналар олинган усулда ишлаб чиқилган. Россия соғлиқни сақлаш вазирлигида таъкидланишича, бундай вакциналарни қўллаш тажрибаси улар 2 йилгача иммунитет беришини кўрсатади. Вакцинанинг биринчи партияси 12 сентябрда Россия ҳудудларига жўнатилган.