Тожикистонда амалдорлар ўз даромади ва мол-мулки тўғрисида янги шаклда ҳисобот берадиган бўлди

Тожикистонда ҳукумат амалдорлари учун декларацияларнинг янги шакллари тасдиқланди, унда улар ҳатто томорқа ер участкасидан келиб тушадиган даромадни ҳам кўрсатишади.

Тожикистон ҳукумати давлат хизматчиларининг даромадлари ва мол-мулки тўғрисидаги декларациялар янги шаклларини тасдиқлади. Уларни тўлдириш тартиби ҳам тасдиқланди.
Даромад солиғи декларациясида мансабдор шахслар даромадлар тўғрисида қуйидаги маълумотларни кўрсатиши керак:

•  асосий иш жойидаги даромадлар
•  асосий бўлмаган иш жойидан олинадиган даромад 
•  илмий, ижодий ва педагогик фаолиятдан келадиган даромадлар 
•  ижарага берилган мулкдан олинган даромадлар
•  томорқа ер участкасидан олинадиган даромад
•  ижарага берилган ердан олинган даромадлар
•  банк омонатлари бўйича даромадлар
•  тижорат ташкилотларининг устав капиталидаги улушдан ва бошқа қимматли қоғозлар бўйича даромадлар
•  бошқа даромадлар (даромад турини кўрсатган ҳолда).

Мулк ҳолати декларациясида эса қуйидагилар кўрсатилиши керак:

•  мулк (хусусий мулк), шу жумладан чет элдаги мулк ҳақида
•  кўчмас ва кўчар мулк тўғрисидаги маълумотлар
•  чорва ва паррандаларнинг сони ҳақида
•  тижорат ташкилотларининг устав капиталидаги акциялар бўйича
•  омонатлар ҳамда қимматбаҳо металлар ва тошлар ҳақида
•  молиявий тусдаги мажбуриятлар ҳақида.

Республиканинг амалдаги қонунчилигига биноан, давлат хизматчилари 1 апрелдан (ҳисобот йилидан кейин) кечиктирмай маҳаллий солиқ хизматларига даромад солиғи декларацияси ва мулк ҳолати тўғрисидаги маълумотномани тақдим этишлари шарт.
Декларацияни тақдим этмаслик ёки уларда нотўғри маълумотлар акс эттирилиши давлат хизматчисини ишдан бўшатиш ва ушбу фуқаронинг давлат хизматига қабул қилинишини рад этиш учун асос бўлиши мумкин.
Ундан олдин амалда бўлган декларацияларда давлат хизматчиларининг йиллик иш ҳақи, даромади ва мулки (автомобиллар, кўчмас мулк ҳамда бошқалар) тўғрисидаги маълумотлар мавжуд эди.
Солиқ органлари декларацияларни эълон қилишга ҳақли эмас, чунки бу Тожикистон Солиқ кодексининг 123-моддаси билан қатъиян тақиқланган.
Аммо, агар муаллифнинг ўзи даромад манбасини ошкор қилишни хоҳласа, бу ҳолатда ҳеч қандай тақиқлар йўқ.