Қозоғистонда сенатга депутатлар сайлови бўлиб ўтади

12 августда Қозоғистонда парламентнинг юқори палатаси – Сенатнинг ваколатлари тугаётган 17 аъзоси ўрнини эгаллайдиган аъзолари сайлови бўлиб ўтади. Сенатдаги 17 ўринга 46 номзод даъвогарлик қилмоқда. Сайловларда маҳаллий ҳокимият вакиллик органлари депутатлари қатнашади.

Фото: Абзал Калиев
Қозоғистон сенатида умумий ҳисобда 49 ўрин бор бўлиб, уларга мамлакатнинг 17 та ҳудудидан 2 нафардан депутат сайланади. Шунингдек, 15 депутат сенатда миллий-маданий турфа хилликни таъминлаш мақсадида президент томонидан тайинланади. Сенаторлар ваколатлари муддати 6 йилни ташкил қилади. Улардан ярми ҳар 3 йилда қайта сайланади.     
2020 йил 15 октябрда сенатнинг ҳудудлардан сайланган 17 аъзоси ваколатлари тугайди ва шу сабаб навбатдаги сайловни ўтказиш зарурати юзага келган. Сайлов натижалари марказий сайлов комиссияси томонидан 7 кун ичида эълон қилинади. 
Сенаторликка Шарқий Қозоғистон областидан 4 номзод, Оқмола, Атирау, Ғарбий Қозоғистон, Қарағанда, Қўстанай, Қизилўрда ва Павлодар областларидан, Нур-Султон, Олмаота ва Чимкент шаҳарларидан  3 нафардан номзод, қолган ҳудудлардан эса 2 нафардан номзод даъвогарлик қилмоқда. 
Аввалги шундай сайловлар республикада 2017 йил 28 июнида бўлиб ўтган. Ўшанда 16 депутат сайланган, чунки Чимкентга република аҳамиятига молик шаҳар мақоми бир йилдан кейин берилган.