Эрон АҚШнинг ёрдамини рад этди

АҚШ ҳукумати Эронга ўпкани сунъий шамоллатиш қурилмаларини тақдим қилган ҳолда коронавирусга қарши курашда ёрдам беришга тайёр. Бироқ Эрон Вашингтоннинг бу таклифини рад этди. 

Жавод Зариф / Фото: Коммерсантъ
АҚШ президенти Дональд Трамп Оқ уйдаги брифингда АҚШ Эронга ўпкани сунъий шамоллатиш қурилмалари билан ёрдам беришга тайёрлигини такрор айтиб ўтган. Унинг таъкидлашича, АҚШда бундай қурилмалардан минглаб бор.
Бироқ Эрон ташқи ишлар вазири Муҳаммад Жавод Зариф бу таклифни рад этиб, Эрон бир неча ой ичида бундай қурилмалардан ўзи экспорт қилишни бошлашини айтган. Зариф Трампни бошқа давлатлар, айниқса Эрон халқи ишларига аралашишни бас қилишга чақирган. Унинг таъкидлашича, Эрон бирорта америкалик сиёсатчининг маслаҳатини қабул қилмайди.
Охирги маълумотларга кўра, Эронда айни вақтда коронавирусга чалинганлар сони 82 мингдан ошган, ундан 5118 киши вафот этган.