«Елкалари устидаги бошлари кетади» — Эрдўған Сурияни яна бир бор огоҳлантирди

«Аскарларимизнинг жонига қасд қилганларни ер билан яксон этиш бўйнимиздаги қарздир. Агар Туркия белгилаган чегарадан ташқарига зудлик билан чиқишмаса, елкалари устидаги бошлари кетади», дея огоҳлантирди Туркия раҳбари.Фото: Milliyet
Туркия президенти Ражаб Тоййиб Эрдўған Адолат ва тараққиёт партиясининг вилоят Кенгаши йиғилишида сўзга чиқди. Йиғилиш олдидан «Баҳор қалқони» амалиёти ҳақида сўз юритган Эрдўған «шаҳидлар тепаси бўш эмаслиги ва бўш қолмаслиги»ни таъкидлади.
Эрдўғаннинг нутқидан келиб чиқувчи сатрбошилар қуйидагича:
«Баҳор қалқони» ҳаракати

«Биз Идлибдаги операцияларимизни чекланган тартибда давом эттираётган эдик, чунки биз бу масалани соғлом фикр ва тинчлик йўли билан ҳал қилишни истагандик. Шу мақсадда биз дипломатия каналлари самарали ишлаши учун сўнгги дақиқагача ҳаракат қилдик ва ишладик. Ушбу масала мамлакатимиз учун қанчалик муҳимлиги, ушбу мақсад орқали нимани кўзлаганимизни такрор-такрор таъкидладик. Бироқ ниятимиз нотўғри тушунилганини кўрдик.
Шу муносабат билан операцияларимизни 34 аскаримиз шаҳид бўлган 27 февралдан эътиборан режимнинг барча элементларини нишонга оладиган шаклда кенг қамровли ҳолатга келтирдик. Биз ушбу операцияни «Баҳор қалқони» операцияси деб номладик. «Фурот қалқони», «Зайтун новдаси», «Тинчлик булоғи» операциялари билан нимани мақсад қилган бўлсак, бу ҳаракатда ҳам шу бир ғояни кўряпмиз.
Биз энди чегараларимиз террорчилик ташкилотлари ва мамлакатимиз сарҳадларига кўз тиккан мустабид тузум тарафидан қуршаб олинишига, миллионлаб бошпанасизлар юки елкамизга муттасил равишда ортилишига изн бермаймиз ва бу қарорда қатъиймиз.
Ҳали Идлиб шаҳидларининг тупроғи совиб улгурмай, режимни энг оғир йўқотишларга учратдик. Ҳозирга қадар 135 танк, 22 зирҳли транспорт воситаси, 45та тўп, 44та кўп барелли ракеталар, 5та ҳаво мудофааси рампаси, 12та танкка қарши қурол, 4та миномёт, 2та учувчисиз самолёт, 8та вертолёт, 49та турли транспорт воситалари, 7та ўқ-дори, 24та зирҳли транспорт воситалари, 9та ўқ-дори омбори, 2та самолёт, 2та ракета учирувчиси ва режимнинг 2557 аскарини яксон қилдик.
Қон тўкилмаслиги, одамлар қурбон бўлмаслиги, азоб чекилмаслиги учун қилган ҳаракатларимизни заифлик ва тортинчоқликка йўйганларга ҳақиқий кучимизни кўрсатишни бошладик. Ҳозирча режимнинг одамлар ва жиҳозлардан маҳрум бўлиши – бу фақат бошланишидир.
Атрофда мамлакатимизни «номи бору, ўзи йўқ» давлатлардан бири, деб билганлар бор. Биз бу ғофилларга Туркиянинг зарур пайтда жон берган, аммо бўйин эгмаган буюк бир давлат эканини кўрсатяпмиз». 

Туркия Сурияда катта йўқотишга учради. Тафсилотлар
«Елкалари устидаги бошлари кетади»

«Ишлар шу нуқтага келганидан биз жуда афсусдамиз. Бунинг сабаби уларнинг ортида турган кучларнинг соясини ўз таналари деб билиб, бизга қарши чиққанлардир. Ҳар бири жонимизнинг бир парчаси бўлган аскарларимизнинг ҳаётига қасд қилганларни ер билан яксон этиш бўйнимиздаги қарздир. Бўлиб ўтган воқеалардан ибрат олмаганларнинг кузатув пунктларимизга ҳужум қилиш билан таҳдид этишлари ҳали ҳам уларнинг ақллари кирмаганидан далолатдир. Агар Туркия белгилаган чегарадан ташқарига зудлик билан чиқиб кетишмаса, елкалари устидаги бошлари кетади»

Россия ва Эрон очиқламаси

«Яна бир бор Россия ва Эронга мурожаат қиламан. Сурияда сиз билан ҳеч қандай муаммомиз йўқ. Туркиянинг Суриядаги кураши сарҳадларни кенгайтириш уриниш ҳам, стратегик базага эга бўлиш ҳам эмас. Биз Сурияда ушбу мамлакатдан қочиб, ўлкамизга оқиб келаётган миллионлаб одамлар келтириб чиқарган гуманитар инқирозни ҳал этиш, шунингдек, сарҳадларимиз хавфсизлигини таъминлаш учун курашмоқдамиз. Икки масала ҳам биз учун жуда муҳимдир.
Ҳудудида 3,7 миллион, чегараларида 1 миллиондан ортиқ кишига паноҳ бўлган давлат на Эрон, на Россиядир. Бу юкни биз 9 йилдан бери ёлғиз бошимиз билан кўтариб келмоқдамиз. Туркия буни зиммасига олмоқда. «Эшикларни ёпинг», дейишяпти. У иш битди, энди Ғарб ҳисоб беради. Газ бомбаси, ҳақиқий бомба билан қўрқитмоқчи бўлганлар энди ҳисоб беришга мажбур. Ғарбнинг қочоқлар қўрқуви билан айтган баландпарвоз гаплари реал ҳаётда аниқ бир ифодасини топмаяпти. Биз йиллар давомида «Сурияда хавфсиз зоналар яратайлик, тузумдан қочган одамлар бу ерда жойлашиб олсин», деган чақириқлар билан чиқдик. Европанинг ҳеч бир давлати ушбу чақириқни қўллаб-қувватламади. Чегараларимизни очганимиздан бери Европага кирганлар сони 100 мингдан ошди. Тез орада бу рақам миллионларда ифодаланади.
Энди чегараларимизни очганимиз учун барчалари айюҳаннос соляптилар. Ё бу инсонларни ўз тупроқларида муносиб бир ҳаётга қовуштирамиз, ёки ҳар ким бу юкдан ўз чекига тушганини олади. Энди бир томонлама фидокорлик даври тугади. 
Мамлакатимизга ёрдам беришини билдирган айрим давлатлар ҳатто туклари ҳам қимир этмай, воқеалар ривожини кузатганидан хабардормиз. Гўё халқаро миқёсда тинчлик ва барқарорлик, хавфсизликни таъминлаш учун ташкил этилган тузилмалар мажлисбозлик, ахборот бериш, қоралашдан бошқа иш қилмайди.
Туркия ўз курашини қандайдир бир давлат ёки ташкилотга ишониб эмас, ўз юрагига, ўз билагига, ўз инсони, ўз имконига таянган ҳолда юритмоқда.
…Бундан ташқари, Туркия шу пайтга қадар Сурияда на Россияни, на Эронни тўғридан-тўғри нишонга олмаган, олмайди ҳам. Ҳаракатларимиз билан фақат аскарларимиз қонини тўккан режим унсурларини йўқ қиляпмиз. Бу ҳассосиятимизга ҳурмат кўрсатилади, деган умиддамиз.
Туркия ҳар бир масаладаги каби Суриядаги муаммони ҳам ўз имконлари билан ҳал эта оладиган ирода ва иқтидорга соҳибдир. Бу кунлар айни пайтда ҳақиқий дўст ва маккор душманларни айириб берувчи палладир. Олдимиздаги кунларда кечадиган воқеалар бу фарқни янада аниқлаштиради. Бу кураш бизнинг шахсий танловимиз эмас, миллатимизнинг умумий иродаси билан юритилмоқда. Суриядаги ўйинни миллатимиз билан бирга кўрдик, ташхис қўйдик ва шунга асосан ҳаракат қилдик. Бу миллат 15 июлда нима учун кўчаларга чиққан бўлса, бугун ҳам Туркия айни сабаб билан Суриядадир. Бу миллат Курдистон ишчилар партияси, ИШИД тажовузларига қарши қандай кўксини керган бўлса, бугун ҳам Туркия айни сабаб билан Идлибда, Суриянинг бошқа жойларидадир».