Зеленский АҚШ вакилларига ишонмаслигини Женева олдидан айтди

Украина Президенти — Владимир Зеленскийнинг айтишича, Женевада Россия билан музокаралар бошланишидан олдин АҚШ президентининг махсус вакили Стив Уиткофф ҳамда Жаред Кушнер унга Москва ҳақиқатан ҳам жангларни тўхтатишни истаётганини билдирган. Бу ҳақда у Axiosга берган интервьюсида маълум қилди.

Зеленскийнинг сўзларига кўра, улар ушбу маълумотдан келиб чиқиб, уч томонлама учрашувда Украина делегацияси ишини мувофиқлаштиришни таклиф қилган. Бироқ Президент бу борада пессимистик кайфиятда эканини таъкидлаб, ўзини бундай фикрга ишонтиришга уринмасликларини сўраган.

Шунингдек, у Дональд Трампнинг Украина муайян ён беришларга бориши кераклиги ҳақидаги баёнотига изоҳ бериб, бу қарор эмас, балки музокара тактикаси бўлишига умид қилаётганини айтган.

Президент таъкидлашича, Донбассдан бир томонлама қўшин чиқариш ёки ҳудудларни Россияга беришни назарда тутувчи келишув украиналиклар томонидан қабул қилинмайди. Унинг фикрича, бундай қарорни халқ кечирмайди. Бироқ мавжуд фронт чизиғида қолишга асосланган келишув референдумда қўллаб-қувватланиши мумкин.

Зеленский ҳудудий масалаларда ечимга эришишнинг энг самарали йўли — Владимир Путин билан шахсий учрашув ўтказиш, деб ҳисоблайди ва жамоасига Женевада етакчилар даражасида учрашув ташкил этиш бўйича топшириқ берган.

Шу билан бирга, у учрашувни Москва ёки Минскда ўтказиш таклифини рад этган.