Хитой АҚШ нашрининг 3 журналистини камситувчи сарлавҳа сабабли аккредитациядан маҳрум қилди

Хитой ташқи ишлар вазирлиги АҚШнинг The Wall Street Journal нашрининг 3 журналистини коронавирус ҳақидаги мақоланинг сарлавҳаси сабабли аккредитациядан маҳрум қилди. Пекиннинг фикрича, ушбу сарлавҳада ирқчиликка йўл қўйилган.

Бу ҳақда Associated Press ахборот агентлиги хабар берди. Мақола WSJׄ’да “Хитой – Осиёнинг ҳақиқий касал кишиси” (China Is the Real Sick Man of Asia) сарлавҳаси билан 3 февралда чиққан.  
Таъкидланишича, нашрнинг 3 журналисти – АҚШ фуқаролари Жон  Чин ва Чао Ден ҳамда австралиялик Филип Венг аккредитациядан маҳрум қилинган ва уларга Хитойни тарк этиш учун 5 кунлик муҳлат берилган.
Мақола Хитойда коронавируснинг тарқалишига бағишланган бўлиб, унда Хитой иқтисодиёти вирус сабабли бошдан ўтказган силсилалар сабабли мамлакатнинг геосиёсий таъсири камайиши мумкинлиги таъкидлаб ўтилган.  
Хитой ташқи ишлар вазири Гэн Шуаннинг таъкидлашича, ушбу сарлавҳа “Хитой ҳукумати ва халқининг вирус тарқалишига қарши саъй-ҳаракатларига соя солади”. “Муаллифлар Хитой халқи ва жаҳон ҳамжамияти томонидан қораланган ва норозилик туғдирган ирқчи ва камситувчи сарлавҳа қўллашган. Хитой халқи камситиш ва ирқчилик тилидан фойдаланувчи ҳамда Хитойга туҳмат қилувчи ва ҳужум қилувчи ОАВларни маъқулламайди. Шу сабабли бугундан бошлаб The Wall Street Journal’нинг 3 журналисти аккредитациясини чақиртириб олишга қарор қилинди”, деб айтган Гэн Шуан.
Хитой АҚШ нашридан узр сўрашни ва сарлавҳага алоқадорларни жазолашни талаб қилган, бироқ нашр бу талабни бажармагач, журналистларни аккредитациядан маҳрум қилишга қарор қилган.
Мақолада Хитойнинг “sick man of Asia” (Осиёнинг касал кишиси) деб аталиши Пекинга хуш келмаган. Чунки бу ибора XIX аср охири - ХХ аср бошида дунёнинг етакчи давлатларига қарши туришга қодир бўлмаган Хитойни таърифлашда қўлланган.   
Таъкидлаш жоиз, WSJ журналистларининг аккредитациядан маҳрум қилиниши АҚШ томонидан Хитойнинг 5 нашри – “Синьхуа” ахборот агентлиги, China Global Television Network телеканаллар тармоғи, Хитой халқаро радиоси, China Daily газетасини чоп этувчи China Daily Distribution Corporation ва Hai Tian Development USA компаниялари “хорижий миссиялар” деб қабул қилиниши ортидан юз берган. 
Жаҳон соғлиқни сақлаш ташкилоти вирус ёки касалликка бериладиган ном у ёки бу давлатни ранжитмаслиги ортидан фаол кузатиб боради. Ташкилот қоидаларига кўра, вирус ва касалликларни уларнинг пайдо бўлиши ва тарқалиши жойи бўйича аташ тақиқланади. ЖССТ янги касалликларга муайян давлатлар, минтақалар, иқтисодиёт тармоқлари ёки одамларга салбий таъсир кўрсатмайдиган нейтрал номларни беришни қўллаб-қувватлайди. 
ЖССТда таъкидланишича, касалликларнинг “Яқин Шарқ респиратор синдроми” ёки “чўчқа гриппи” каби номланиши Яқин Шарқ минтақаси ва  иқтисодиётнинг тегишли тармоғига нисбатан салбий муносабат келтириб чиқарган.
Шу сабабли ЖССТда янги коронавирусга нейтрал “Covid-19” номини беришга қарор қилинган.