Бразилия “Катта еттилик”нинг ёрдамини рад этди ва Макронга Нотр-Дамдаги ёнғинни эслатиб қўйди

Бразилия “Катта еттилик” давлатларининг Амазония ўрмонларидаги ёнғинларни ўчиришдаги ёрдамини рад этди. Бу ҳақда Бразилия президенти маъмурияти бошлиғи Оникс Лоренцонига иқтибос келтирган ҳолда G1 портали хабар берди. 
Аввалроқ Франция президенти Эммануэль Макрон “еттилик” Амазониядаги ўрмон ёнғинларини ўчириш учун 20 млн евро миқдорида шошилинч ёрдам юборишини айтган. Канада ҳам 15 млн доллар ажратишга ваъда берган.
Бироқ Бразилия ушбу ёрдамни рад этди.
“Раҳмат, бироқ эҳтимол, бу ресурслар Европадаги ўрмонларни тиклаш учун фойдалироқ бўлади. Макрон жаҳон мероси объекти ҳисобланувчи черковдаги яққол ёнғиннинг олдини ололмайди-ю, яна бизга мамлакатимизда нима қилиш кераклигини ўргатади. У ўз уйида ва француз мустамлакаларида қайғурадиган кўп нарса бор”, деб айтган Лоренцони. 
Унинг таъкидлашича, Бразилия исталган давлатга ўмонларни қандай сақлаш кераклигини кўрсатиб қўя олиши мумкин. 
Амазония ўрмонларидаги кучли ёнғинлар бир неча ҳафтадан бери давом этмоқда. Уларнинг майдони 2018 йилги ёнғинлар майдонидан деярли 2 марта кўпроқни ташкил қилмоқда. 
Аввалроқ Бразилия раҳбарияти сайёрамиздаги кислороднинг 20 фоизи ишлаб чиқарилувчи ва “сайёра ўпкаси” деб аталувчи ўрмонлардаги ёнғинларни атайлаб ўчирмаётганликда айбланган.