Латукӯб дар заминаи рашк: зани 38-солаашро дар ҳамхобагӣ бо ҷияни ноболиғ айбдор кард

Мақомоти умури дохилӣ алайҳи сокини 38-солаи ҷамоати деҳоти Сурхи шаҳри Исфара бо иттиҳоми расондани зарари вазнини ҷисмонӣ парвандаи ҷиноӣ боз кардаанд.

ВУД мегӯяд, муноқиша дар заминаи рашки мард нисбати ҳамсари 38-солааш, ки гӯиё бо ҷияни ноболиғаш муносиботи маҳрамона дорад, рух додааст.

Манбаъ афзуд, муттаҳам 31-уми августи соли равон, тахминан соати 03:00, дар хонаи истиқоматиаш бо ҳамсар аз рӯи ҳиссиёти рашк ҷанҷол карда, ӯро кӯфтааст.

Таъкид шудааст, ки худи ҳамон рӯз, тахминан соати 06:00, марди муттаҳам ба хонаи истиқоматии ҷияни ноболиғаш, ки гӯиё бо ҳамсараш муносиботи маҳрамона доштааст, ҳозир шудааст.

Мард писарбачаи 15-соларо бо баҳонаи ҳамроҳ ба саҳро рафтан ба назди дари ҳавлӣ даъват карда, бо мушташ ба пешониаш зада, сипас бо мушту лагад ва як рӯдаи оҳанин ноболиғро кӯфтааст, омадааст дар иттилоияи ВУД

Ин ниҳод бо такя ба хулосаи ташхиси судӣ-тиббӣ ҷароҳати бардоштаи ҷабрдидаро зарари вазнин ба саломатӣ арзёбӣ кардааст.

ВУД илова намуд, ки феълан алайҳи гумонбаршаванда бо моддаи 110 - расондани зарари вазнин ба саломатӣ ва моддаи 111 -и Кодекси ҷиноӣ - расондани зарари миёна ба саломатӣ парванда оғоз шуда, тафтишот идома дорад.