Вазорат: шабонарӯзи гузашта ягон ҳодисаи нави сироятёбӣ ба COVID-19 ба қайд гирифта нашуд
Вазорати тандурустии Тоҷикистон мегӯяд, аз замони хуруҷи маризии коронавирус то ҳол 13 305 нафар гирифторони ин дард комилан шифо ёфтанд.
Вазорати тандурустии кишвар эълон кардааст, ки вазъи коронавирус дар Тоҷикистон ҳамарӯза рӯ ба беҳбудӣ дорад.
Бар иттилои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, дар шабонарӯзи охир дар ҷумҳурӣ ягон ҳодисаи нави гирифторшавии шаҳрвандон ба бемории коронавируси нави COVID-19 ба қайд гирифта нашудааст.
Манбаъ меафзояд, аз замони хуруҷи ин маризӣ, 13 305 нафар олудаи вируси COVID-19 гардиданд.
Аз ин миён аллакай 13 111 нафар ва ё 98,5 фисади мубталоён комилан шифо ёфта аз дармонгоҳҳои кишвар мураххас шуданд.
Зимнан, ба таври расмӣ 90 гирифтори коронавирус дар Тоҷикистон қурбон шуданд.
Вазорати тандурустӣ мегӯяд, феълан 104 нафар бо нишонаҳои сабуки бемории мазкур дар хона зери назорати дармонгоҳӣ қарор доранд.
Комментарии (0)