Ҳасану Ҳусейн ва Фотимаю Зӯҳроро як модари душанбегӣ баробар таваллуд кард

Субҳи 16 декабр дар таваллудхонаи №3-и шаҳри Душанбе як модар чоргоник – ду писар ва ду духтар ба дунё овард. Тифлони чоргоник феълан дар шуъбаи эҳё қарор доштаанд, зеро ба гуфтаи табибони ин муассиса норасид ба дунё омадаанд.Модари хушбахти ин 4 тифл Сарвиноз Аскарова 34 сола ва соҳиби ду писари яке 14 ва дуюмӣ сеюнимсола будааст.

Падари чоргоникҳо Далер Файзалиев зодаи шаҳри Бохтар буда, дар пойтахт иҷоранишин асту дар як ширкат кор мекунад

Ба гуфтаи духтури шуъбаи эҳёгарии навзодон Фарида Кароматуллоевна, кӯдакон пеш аз муҳлат таваллуд шудаанд ва чанд муддат модару кӯдакон зери назорати мутахассисон қарор хоҳанд гирифт.

Ёдовар мешавем, ки чунин ҳолат соли 2018 дар Душанбе ва дар вилояти Суғд ба қайд гирифта шуда буд ва ҳамон замон дар ВМКБ низ бори аввал чоргоникҳо таваллуд шуданд.