Ҷасади Исмоил баъди 77 рӯз ёфт шуд: падаре, ки ҳамроҳи се узви оилааш дар Айнӣ ғарқ шуд
Баъди ҷӯстуҷу ва такопуйҳои зиёд, ҷасади исмоил Шомирзоеви 61-сола, ки тобистони имсол ҳамроҳ се аъзои хонаводааш ба коми дарё фуруъ рафта буд, аз об бурун оварда шуд
Мирзошо Булбул, сардори шуъбаи Кумитаи ҳолатҳои фавқуллода ва мудофияи гражданӣ дар ноҳияи Айнӣ бо ироаи ин хабар ба Sputnik Тоҷикистон гуфт, ҷасади шаҳрванд Шомирзоев Исмоил Давлатовичи 61 сола, истиқоматкунандаи деҳаи Махшевад, аз соҳили Фондарё, воқеъ дар мавзеи Қуруни Сиёҳи ноҳия аз зери пули (купрук) шаҳраки Зарафшон пайдо шуд.
Ба иттилои манбаъ, ҷасади марҳум аз тарафи аҳолӣ бароварда шуда, ба мақомотҳои дахлдор супорида шуд.
“Дар зери санги калон дармондааст. Дар ҷое, ки ғарқ шуда буд, сангҳои калон мавҷуд будаанд. Ҳоло оби дарё соф шуда дидани он сангҳо ҳам имконпазир аст. Хешу табораш тасодуфан ба ҷои ғарқшавӣ назар карда, дар зери санг ҷасади Исмоилро дарёфта, ба қабристон бурда дафн кардаанд”, гуфт, сардори шуъбаи КҲФ ноҳияи Айнӣ дар суҳбат ба Sputnik Тоҷикистон.
Дарёфти ҷасади Исмоил Шомирзоев, нафари дуюм аз ғарқшавии чаҳор чаҳор узви як хонавода дар ноҳияи Айнӣ гуфта мешавад.
Ҷасади Гулҳавас, духтари 33 солаи Шомирзоевро, баъд аз 17 рӯзи ҷустуҷуву такопуйҳои зиёд, рӯзи 31 уми август, кормандони КҲФ дар ноҳияи Айнӣ, аз ҳудуди деҳаи Зарафшон дар наздикии зеристгоҳи барқӣ пайдо намуда буданд.
Рӯзи 14 август, Исмоил Шомирзоев, ҳамроҳи духтур ва келину набераи ду солааш, ҳангоми гузаштан аз соҳили дарёи рости Искандар ба соҳили чап бо заврақ (лебёдка) и худсоз дар дарё афтида, ҳама якбора ғарқ мешаванд.
Комментарии (0)