Вазорати тандурустӣ: дар Тоҷикистон коронавирус ба қайд гирифта нашудааст

Вазорати тандурустӣ ва ҳифзи иҷтимоии аҳолии Ҷумҳурии Тоҷикистон иттилоъ медиҳад, ки аз 1 феврал то 31 марти соли равон 6222 нафар шаҳрвандоне, ки аз кишварҳои хориҷ ба Тоҷикистон ворид гардиданд, дар беморхонаҳои сироятӣ ва осоишгоҳҳои мамлакат ба карантин фаро гирифта шудаанд.

Аз ин шумора то рӯзи зикргардида 2145 нафари онҳо ба хонаҳояшон рухсат дода шуда, айни ҳол 4077 нафарашон дар беморхонаҳои сироятии мамлакат дар карантин қарор доранд.

Ёдрас мешавем, ки созмони ҷамъиятии "Нур" овозаҳои гирифтории се муҳоҷири тоҷик ба коронавирусро беасос хонд.

Броимшо Маҳмадшоев дилпизишк ва ёвари тиббии Созмони "Нур", рӯзи 29 март дар суҳбат гуфт, то ҳол миёни муҳоҷирони тоҷик дар Маскав ягон ҳолати гирифторӣ ба коронавирус ба қайд гирифта нашудааст.