Вазорати тандурустӣ: аз 1603 нафар ҳоло 323 тан дар карантин қарор доранд
Вазорати тандурустии Тоҷикистон мегӯяд аз 1 феврал то 14 - уми март ҷамъан 1603 нафар ба карантин фиристода шуданд, ки феълан танҳо 323 тан дар карантин қарор доранд
Вазорати тандурустӣ иттилоъ медиҳад, аз 1 феврал то 14 марти соли равон 1603 нафар шаҳрвандоне, ки аз кишварҳои Ҷумҳурии Мардумии Чин, Кореяи Ҷанубӣ, Ҷопон, Италия, Эрон ва Афғонистон ба Тоҷикистон ворид гардиданд, ба карантин фаро гирифта шудаанд.
Ба иттилои манбаъ, аз ин шумора то санаи зикргардида 1280 нафари онҳо ба хонаҳояшон рухсат дода шуда, айни ҳол 323 нафар дар беморхонаҳои сироятии мамлакат дар карантин қарор доранд.
Ҳамзамон, Вазорати тандурустӣ иттилоъ медиҳад, ки то имрӯз сирояти коронавирус дар мамлакат ба қайд гирифта нашудааст. Аммо, новобаста ба ин, чораҳои пешгирӣ ҷиҳати интиқоли сирояти мазкур ба мамлакат пурзӯр карда мешаванд.
Айни замон сирояти коронавирус дар бештар аз 114 кишвари олам ба қайд гирифта шуда, тибқи иттилои Созмони Ҷаҳонии Беҳдошт, то санаи 13 марти соли равон ҷамъан аз ин сироят 5000 нафар ба ҳалокат расидааст.
Маврид ба зикр аст, ки бо мақсади пешгирӣ аз интиқоли сирояти коронавирус дар сатҳи Ҳукумати ҷумҳурӣ ва вазорату идораҳои дахлдори кишвар ситоди корӣ ва байниидоравӣ фаъолият менамояд.
Комментарии (0)