Пешниҳоди ахбори носаҳеҳ ба Президент: эроди Раҳмон аз ёвар, Ятимов ва додситони кул-видео
Эмомалӣ Раҳмон, раисиҷумҳури Тоҷикистон, ки судяҳоро бо фармонаш таъину барканор мекунад, аз он нигаронӣ намуд, ки зимни интихобу ҷобаҷогузорӣ дар мавриди кадрҳо барояш маълумоти ғалат ва ахбори на он қадар саҳеҳ пешниҳод мешавад
Раисиҷумҳури Тоҷикистон зимни суҳбат дар бораи фасодкории додрасҳо дар кишвар, аз ёвараш дар умури кадрҳо, Асадулло Раҳмонов, Сайммуъмин Ятимов, раиси КДАМ, Юсуф Раҳмон, додситони кул ва раёсати Ожонси мубориза бо фасод эрод гирифт, ки маълумоти пешниҳодкардаашон дар мавриди бархе кадрҳо саҳеҳу воқеӣ нестанд.
Раисиҷумҳур зикр кард, ки дар вақти интихобу ҷобаҷогузории кадрҳо, онҳо мавриди омӯзиш қарор мегиранд, аммо баъдан маълум мешавад, ки ахбори ироашуда на он қадар саҳеҳ аст.
“Асадулло Қиматович, дар вақти интихобу ҷо ба ҷо кардани кадрҳо, Саймуъмин Сатторович, Агентии назорати молиявӣ ва мубориза бо коррупсия, прокурори генералӣ, дар бораи ҳар яки инҳо маълумот ҳаст, меомӯзед. Маълум мешавад, ки 50 фоизе, ки мо меомӯзем, рӯякӣ аст ҳамаш. Маълумот ғалат аст. Ахборот на он қадар саҳеҳ аст”, - изҳор дошт Эмомалӣ Раҳмон дар хитоб ба роҳбарон.
Ӯ дар муроҷиат ба додрасҳо афзуд, савганд ёд мекунанд, ҳамчун фарзандам насиҳат мекунам, аммо 6 моҳ нашуда даст ба ҷиноят мезананд.
Раисиҷумҳури Тоҷикистон зарурати тоза сохтани мақомоти додгоҳиро аз шахсони тасодуфӣ таъкид намуда, дастур дод, ки дар масъалаи интихобу ҷобаҷогузории кадрҳо ва пешниҳоди номзадҳо ба вазифаи судягӣ донишу маҳорат ва сифатҳои ахлоқии онҳо мавриди омӯзишу санҷиши ҳамаҷониба қарор дода шавад.
Комментарии (0)