Исроил Жўлон тепаликларида пайдо бўладиган аҳоли пунктини Трамп шарафига атади

Исроил ҳукумати Жўлон тепаликларида АҚШ президенти Дональд Трамп шарафига аҳоли пункти қуриладиган жойда “Рамат-Трамп” номли белгининг очилиши рамзий маросимини ўтказди.
Исроилликлар шу тариқа Сурия эътирозларига қарамай Жўлон тепаликларининг Исроил ҳудуди деб тан олиниши учун Трампга миннатдорлик изҳор этишмоқчи бўлишган.
“Биз аҳоли пунктини бунёд этиш ва буюк дўстимизга миннатдорлик билдириш имкониятига эгалигимиздан фахрланамиз. Биз Жўлонни аҳоли, яҳудийлар ва яҳудий бўлмаганлар, бутун Исроил давлати манфаати учун қуришни ва ривожлантиришни давом эттирамиз”, деб айтган Исроил бош вазири Биньямин Нетаньяху.
Маросимга, шунингдек, АҚШ элчиси Дэвид Фридман ҳам чақиртирилган бўлиб, у Нетаньяхуга Трампга кўрсатилган ушбу илтифот учун миннатдорлик билдирган. 
Нетаньяху маросимдаги нутқида Жўлон тепаликлари абадий Исроилники бўлиб қолишини айтган ва ушбу ҳудуднинг босиб олинишининг АҚШ томонидан тан олинишини “теран қарор” деб атаган.
Фридман эса аҳоли пунктининг Трампнинг шарафига аталишини яқинда туғилган кунини нишонлаган АҚШ президенти учун энг яхши совға деб атаган.
Шундан кейин Нетаньяху ва Фридман “Рамат-Трамп” (Трамп тепалиги) белгиси устидан уни беркитиб турган матони тортиб олишган. Маҳаллий ОАВнинг ёзишича, аҳоли пунктининг қурилиш ишларига фақатгина бўлғуси ҳукумат старт бериши мумкин. Ушбу ҳукумат 17 сентябрга белгиланган, бир йил ичидаги иккинчи сайловлар натижаларига кўра шакллантирилади.