Россия ва Хитой АЭС қуришга доир шартнома имзолади

5 июнь куни Хитой Халқ Республикаси раиси Си Цзинпиннинг Россияга амалга оширган давлат ташрифи доирасида Россия ва Хитой давлат раҳбарлари иштирокида Москвада дизайни россиялик мутахассислар томонидан ишланган ВВЭР-1200 реакторларига эга “Сюйдапу” АЭС 3- ва 4-энергоблокларини қуришга доир асосий шартномани имзолаш маросими бўлиб ўтди.     
Ҳужжатлар “Росатом” давлат корпорациясининг инжиниринг дивизиони ва СNNC корпорацияси корхоналари (Хитой Халқ Республикаси) вакиллари томонидан имзоланди, дея хабар беради "Росатом" давлат корпорацияси.    
“Бугун биз янги майдонда россиялик мутахассислар томонидан дизайни ишланган АЭС қуриш лойиҳасининг амалий босқичига ўтдик. Тяньван станцияси бўйича аввал имзоланган шартномани инобатга олиб, олдимизда 2028 йилгача хитойлик ҳамкорларимиз билан биргаликда тўртта “3+” янги авлод энергоблокларини қуриш вазифаси турибди”, - деди корпорация бош директори Алексей Лихачев.  
Аввалроқ, 2019 йилнинг март ойида, ВВЭР-1200 реакторларига эга, дизайни россиялик мутахассислар томонидан ишланган “Тянвань” АЭС 7- ва 8-энергоблокларини қуришга доир шартнома имзоланган эди. 
“Сюйдапу” АЭС 3-блокини ишга тушириш - 2027 йилга, 4-блоки эксплуатацияси эса – 2028 йилга мўлжалланган. “Тянвань” АЭС 7-блокини ишга тушириш - 2026, 8-блокини эса – 2027 йилга режалаштирилган. 
Шартномаларни тайёрлаш 2018 йил 8 июнь куни РФ президенти Владимир Путиннинг Хитойга амалга оширган  давлат ташрифи давомида имзоланган битимларнинг  стратегик пакетига мувофиқ амалга оширилди. Мазкур  битимлар яқин ўн йилликда атом энергетикаси соҳасида Россия ва Хитой ўртасидаги ҳамкорликни ривожлантиришнинг асосий йўналишларини белгилаб берди.