Денгиз отларида болаларни эркаклари дунёга келтиришини билармидингиз

Денгиз отларида ҳомиладорликка ўхшаш жараённи эркаклари бошдан кечириб, болаларни дунёга келтиради. Урғочи тухумларини эркакнинг қорин қисмидаги махсус халтачага жойлаштиради ва эмбрионлар шу ерда 2–4 ҳафта давомида ривожланади. Эркак халтачасини мушаклари ёрдамида қисқартириб, бир туғишда бир неча ўнлаб, айрим ҳолларда эса 2 мингтагача болани дунёга келтириши мумкин. Туғилган кичик денгиз отлари ота-онаси парваришисиз мустақил ҳаёт бошлайди.

Денгиз отлари табиатдаги энг ноодатий кўпайиш усулларидан бири билан ажралиб туради. Аксарият ҳайвонларда ҳомиладорлик урғочи организмида кечса, денгиз отларида бу вазифани эркак бажаради. Бу ҳақда National Geographic хабар берди.

Урғочи денгиз оти тухумларини эркакнинг қорин қисмидаги махсус халтачага жойлаштиради. Шундан сўнг тухумлар шу халтача ичида уруғланиб, эмбрионларнинг ривожланиши бошланади.

Эркак денгиз отининг халтачаси шунчаки тухумларни сақлаб турадиган жой эмас. У ерда ривожланаётган эмбрионлар учун зарур шароит яратилади. Халтача эмбрионларни кислород билан таъминлаш, сувдаги туз миқдорини мувозанатлаш ва уларнинг ривожланишига мос муҳитни сақлашда муҳим рол ўйнайди. Шу сабабли айрим олимлар уни сутэмизувчилардаги плацентага қисман ўхшаш тизим сифатида баҳолайди.