Қирғизистон парламенти муддатидан аввал бўлиб ўтадиган президентлик сайлови кунини белгилай олмади

Қонун бўйича парламент президент истеъфога чиққанидан сўнг етти кун ичида янги сайлов муддатини эълон қилиши лозим.

Қирғизистон парламенти кворум йўқлиги туфайли муддатидан аввал бўлиб ўтадиган президентлик сайлови кунини белгилай олмади.
 "Муддатидан аввал бўлиб ўтадиган президентлик сайлови кунини эълон қилиш учун 51 нафар депутат иштирок этиши лозим, залда бор-йўғи 27 депутат бор. Муддатни белгилашнинг имкони йўқ", - деди парламент вице-спикери Аида Касималиева.
Қонун бўйича парламент президент истеъфога чиққанидан сўнг етти кун ичида янги сайлов муддатини эълон қилиши лозим.
Депутатлар муддатидан аввалги президентлик сайловини 10 ёки 17 январда ўтказишни таклиф қилишди.
Қирғизистон марказий сайлов комиссияси раиси Нуржан Шайлдабекова сайлов кунини эълон қилиш учун яна бир кун муҳлат борлигини айтди.
"Парламент сайлов муддатини эртага эълон қилиши мумкин", - деди Шайлдабекова.
Эслатиб ўтамиз, Сооронбай Жээнбеков 15 октябрь куни Қирғизистон президентлигидан истеъфога чиқди.
Президентнинг истеъфосидан кейин, Конституцияга кўра, давлат раҳбарининг барча мажбуриятлари парламент спикери Канат Исаевга ўтиши керак эди. У бу ваколатдан воз кечгач, президентлик ваколатлари Садир Жапаровга ўтди.