Лукашенко янги президентлик муддатига номзодини қўймасликка ваъда бергани маълум қилинди

Беларусь президенти Александр Лукашенко янги конституция қабул қилингандан кейин навбатдаги президентлик муддатига номзодини қўймасликка ваъда берди. Бу ҳақда президент лавозимига даъвогарлик қилган Виктор Бабариконинг вакили Юрий Воскресенский маълум қилди.

Воскресенскийнинг таъкидлашича, Лукашенко янги муддатга номзодини қўймасликка ҳибсда ушлаб турилган мухолифат вакиллари билан 10 октябрда ўтган учрашувида ваъда берган.
“У “давра суҳбати” иштирокчиларига президентликдан тўйганини айтди ва бу унинг охирги муддати эканига ваъда берди”, деб маълум қилган президентнинг мухолифатчилар билан учрашувига изоҳ бериб Воскресенский. Унинг ўзи ҳам ҳисбга олинганлар орасида бўлган ва ўша учрашувда иштирок этган. Учрашувдан кўп ўтмай у озод этилган.
Мухолифатчининг таъкидлашича, у Лукашенконинг сўзларига ишонади. Унинг айтишича, Лукашенко янги конституцияда президентлик муддатларини чеклашга ҳам тайёр. 
“Сизга “давра суҳбатидан яна бир сенсацияни маълум қиламан. Лукашенко “Сизга сўз бераман, шахсан ўзим конституцияда президентлик муддатлари иккита муддат билан чекланиши учун тузатмалар киритиш таклифи билан чиқаман”, деб айтди”, деб маълум қилган Воскресенский.
Унинг фикрича, Лукашенко конституцияга бир қатор бошқа таклифларни, жумладан парламент роли кучайтирилишини қўллаб-қувватлашга тайёр.
“Аввал у бунга тайёр эмас эди, чунки бунга жамиятдан талаб бўлмаган. Бироқ энди жамият бундай ўзгаришлар учун етилди”, деб ўз сўзларини якунлаган мухолифатчи.
Александр Лукашенко 9 августда ўтган президентлик сайловлари натижаларига кўра 6-муддатга қайта сайланганди. У 23 сентябрдан ўз лавозимини бажаришга киришган.