Сурияда яна ўт очилди, Эрдўған амалиётни давом эттириш билан таҳдид қилди

«Туркларнинг Рас ал-Айн шаҳри яқинидаги Умм ал-Хайр қишлоғига авиазарба бериши оқибатида тинч аҳоли вакиллари бўлган беш киши ҳалок бўлди», дейилади Ikhbariya хабарида.
Хабарда айтилишича, ҳужум оқибатида яна 20 киши жароҳатланган. 
Курдлар вакили ҳам Туркия томонидан келишув бузилгани ҳақида маълум қилган. Курдларнинг билдиришича, ҳалок бўлганлар – араб ва курдларнинг Сурия демократик кучлари (SDF) жангчилари, жароҳатланганлар орасида тинч аҳоли вакиллари ҳам бор.
Бу хабарлар ортидан Туркия президенти Ражаб Тоййиб Эрдўған курдлар чегара ҳудудидан узоққа олиб кетилмас экан, Анқара ҳарбий амалиётни давом эттиришини маълум қилди.
«Агар АҚШ сешанба оқшомигача ваъдасини бажарса, хавфсиз ҳудуд масаласи ҳал бўлади. Акс ҳолда амалиёт тўхтаган жойидан давом эттирилади», деди Истанбулда чиқиш қилган Эрдўған.
17 октябрь куни Эрдўған ва АҚШ вице-президенти Майк Пенс 120 соат ичида туркларнинг Суриядаги ҳарбий амалиётини тўхтатиш бўйича келишувга эришганди. Келишувга кўра, курд ҳарбийлари Суриянинг Туркия билан чегара чизиғидан 30 км ичкарига олиб кетилиши кўзда тутилган. АҚШ бу шарт бажарилишини ўз зиммасига олган. Пенс АҚШ ҳарбийлари бу ҳудудга қайтарилмаслигини қўшимча қилган.
«Тинчлик булоғи» амалиёти
Туркиялик ҳарбийлар 9 октябрь куни Сурия чегарасини кесиб ўтиб, курдларга қарши ҳарбий ҳаракатлар бошлаганди. Улар АҚШ президенти Сурия шимолидаги америкалик ҳарбийлар олиб кетилишини эълон қилганидан сўнг «Тинчлик булоғи» номли амалиёт бошлашга қарор қилишганди.

Расмий Анқара курд ҳарбий бўлинмаларини Туркиянинг жанубий чегараларидан узоқроққа суриб ташлаб, чегара ҳудудида суриялик қочқинлар учун «хавфсиз ҳудуд» барпо этишни режалаштирганди.
Бу амалиётни танқид қилувчилар, бу амалиёт биринчи навбатда курдларга қарши этник геноцидга айланиб кетиши мумкинлигидан хавотир олишганди. Шунингдек, курдлар назорат қилаётган қамоқхона ва лагерлардан ИШИДнинг минглаб собиқ жангарилари қочиб кетиши хавфи туғилди.
Ҳарбий ҳаракатлар бошлангач, ўн минглаб одамлар ўз бошпаналарини тарк этишди.