Боздошти як хонандаи мактаб дар пайванд ба куштори як кирокаш дар Ёвон

Дар пайванд ба марги Лутфулло Сафаров, кирокаше, ки аввали моҳи апрел ба таври мармуз кушта шуд, як ноболиғ боздошт ва алайҳаш бо гумони “одамкушӣ бо бераҳмии махсус” парвандаи ҷиноятӣ боз шудааст. Дар ин бора Додситонии кул дар посух ба муроҷиати падари марҳум навиштааст ва бо нусхаи он “Азия-Плюс” ошно шуд.
Додситонии кулли Тоҷикистон рӯзи 30-юми апрел дар посух ба муроҷиати Фатҳулло Сафаров, падари кирокаши кушташуда, аз додситони вилояти Хатлон хостааст, ки “тафтиши қазияро зери назорат гирад”.
Дар ин санад аз додситони вилоят хостаанд, ки шикояти Сафаровро “дар хусуси яктарафа ва тафтиши нопураи ҳодисаи куштори писараш Лутфулло Сафаров бо парвандаи ҷиноятӣ нисбати ноболиғ Б. А. бо моддаи 104, қисми 2, банди “е”-и КҶ” холисона баррасӣ карда, аз натиҷааш ӯро огоҳ кунанд.
Бар асоси ин иттиҳом ба ноболиғ аз 15 то ҳабси абад таҳдид мекунад.